பாரதியின் பார்வையில் தெய்வம்

நாட்டு மக்கள் பிணியும் வறுமையும்

நையப் பாடென் றொரு தெய்வங் கூறுமே!

கூட்டி மானுடச் சாதியை ஒன்றெனக்

கொண்டு வையம் முழுதும் பயனுறப்

பாட்டி லேயறங் காட்டெனு மோர்தெய்வம்.

அல்லி னுக்குட் பெருஞ்சுடர் காண்பவர்

அன்னை சக்தியின் மேனி நலங்கண்டார்,

கல்லி னுக்குள் அறிவொளி காணுங்கால்

கால வெள்ளத் திலேநிலை காணுங்கால்

புல்லி னில்வயி ரப்படை காணுங்கால்

பூத லத்தில் பராசக்தி தோன்றுமே!

தெய்வம் யாவும் உணர்ந்திடும் தெய்வம்,

தீமைகாட்டி விலக்கிடுந் தெய்வம்.

உய்வ மென்ற கருத்துடை யோர்கள்

உயிரி னுக்குயி ராகிய தெய்வம்,

செய்வ மென்றொரு செய்கை யெடுப்போர்

செம்மை நாடிப் பணிந்திடு தெய்வம்

கைவ ருந்தி உழைப்பவர் தெய்வம்,

கவிஞர் தெய்வம், கடவுளர் தெய்வம்.

சிறியாரை மேம்படச் செய்தால்- பின்பு

தெய்வம் எல்லோரையும் வாழ்த்தும்.